Rubrika "Personazhi i ditës" - Kristi Pinderi

Kristi Pinderi është një aktivist për të drejtat e komunitetit LGBT+ në Shqipëri.

Në mars të vitit 2012 ai themeloi organizatën Pro-LGBT, një organizatë e cila shërbeu për rritjen e ndërgjegjësimit mbi problematikat që komuniteti LGBT+ kishte dhe për rritjen e vizibilitetit të komunitetit. Në maj të 2012, së bashku me 8 aktivistë të komunitetit LGBT+, ai pedaloi në bulevardin “Dëshmorët e Kombit” dhe ky aktivitet qe Pride i parë në Shqipëri.

Kristi së bashku me aktivistë të tjerë kanë lobuar fuqishëm për “Ligjin për mbrojtjen nga diskriminimi” i cili u miratua ne vitin 2013. Në 2015, Kristi bashkë me Xheni Karaj dhe aktivistë të tjerë, realizuan dokumentarin SkaNdal i cili tregon historikun e lëvizjes LGBT në Shqipëri.

Kristi edhe pse tashmë jeton në Kanada prej disa vitesh, vazhdon të jetë i angazhuar në aktivizëm si në qytetin ku jeton ashtu edhe në Shqipëri. Ai është ideatori i PrideOn, Pride i parë virtual në Shqipëri dhe jo vetëm.

Rubrika "Personazhi i ditës" - Elidjon Grembi

Elidjon Grembi është një ndër aktivistët e parë në Shqipëri për të drejtat e komunitetit LGBTQI+. Ai ka qenë një ndër organizatorët e aksioneve të para të zhvilluara në terren si, ‘’Doktorët e homofobisë’’, lyerja e stolave të Parkut të Rinisë me ngjyrat e flamurit LGBTI, shpërndarja e broshurave informuese.

Ai ishte anëtari i parë i komunitetit gej që pozoi për posterin ‘’Unë jam Gej dhe mund të jem kushdo’’. Elidjoni i ka dhënë vizibilitet komunitetit gej duke marrë pjesë në intervista televizive të kanaleve të huaja si Le Monde dhe përmes spoteve ndërgjegjësuese të realizuara nga Aleanca.

Në vitin 2013 u bë pjesë e dokumentarit Skandal, ku ndau dhe ekperiencat e tij me pasojat e të jetuarit hapur si djalë gej në një vend si Shqipëria.

Elidjoni ka dhënë një kontribut të vyer për organizimin e Tirana Pride që në fillesat e saj.

Rubrika "Personazhi i ditës" - Alba Ahmetaj

Alba Ahmetaj është juriste dhe bashkëthemeluese e organizatës për të drejtat e komunitetit LGBT+ në Shqipëri, ProLGBT.

Ajo është një ndër asetet e platformës Historia Ime që në fillimet e saj. Zëri i Albës është i dukshëm, sidomos në seksionet e feminizmit, LGBT-së dhe të drejtave të njeriut të portalit, pasi motivimi i saj ka qenë më i fokusuar në këtë drejtim.

Alba është aktiviste prej 10 vitesh për avancimin e të drejtave të komunitetit LGBT+ në Shqipëri dhe ka luftuar për të ndihmuar përmirësimin e jetës së grave dhe vajzave të këtij komuniteti. Ajo është drejtoresha e programeve të dedikuara grave dhe vajzave të komunitetit LBT.

Rubrika "Personazhi i ditës" - Edlira Mara

Edlira Mara është aktiviste e lëvizjes LGBT+ prej 10 vitesh dhe një feministe e flaktë. Është bashkëthemeluese e ProLGBT si dhe ka kontribuar në fillimet e portalit Historia Ime. Ajo është pjesë e  stafit të Strehës, shelterit të parë për personat LGBT+ në të gjithë Europën Juglindore që në vitin 2014 në pozicionin e outreach/koordinatore terreni. Ka mbaruar studimet Bachelor për Manaxhim Biznesi dhe është mbrojtëse e apasionuar e të drejtave të njeriut në përgjithësi.

Vizioni i Edlirës është integrimi më i gjerë i sa më shumë individëve nga komuniteti LGBT+, në një shoqëri më të lirë, të hapur, të barabartë dhe gjithëpërfshirëse për personat LGBT+. Edlira gjithashtu ka qënë koordinatore e projektit "Besim dhe Siguri 1" ku qëllimi ishte rritja e ndërgjegjësimit të komunitetit LGBT+ për të denoncuar incidente kriminale me bazë homofobie dhe të informojnë forcat e policisë mbi format e diskriminimit kundër këtij komuniteti.

Rubrika "Personazhi i ditës" - Kejda Jahja

Kejda Jahja është një ndër aktivistet e para në Shqipëri për të drejtat e komunitetit LGBTQI+. Ajo ka qënë një ndër nismëtaret e lëvizjes për të drejtat LGBTQI+ në Shqipëri. Në dokumentarin SkaNdal shfaqet se si Kejda takohet me Xhenin dhe fillojnë të hedhin hapat e para drejt një lëvizjeje të re shoqërore, e cila lufton për të drejta të barabarta për komunitetin.

Që në moshë të vogël ajo tregon se ka dal hapur te shoqëria dhe familja për orientimin e saj seksual: “Unë kam qenë e vetmja që në moshën 13­ vjeçare ia kam bërë të ditur si familjes sime, ashtu dhe shoqërisë që më rrethonte, faktin që unë jam lesbike, dhe se jam krenare që jam e tillë. Këto janë ndjenjat e mia, ndaj nuk mund të shtirem ndryshe. Jeni të lirë të më pranoni, ose të mos më pranoni!”

Përveç gjurmëve që ajo ka lënë në historinë e komunitetit LGBTQI+ në Shqiperi, nëpërmjet aksioneve dhe fushatave të ndryshme, ajo bashkë më të dashurën e vetë kanë qënë lesbiket e para që kanë marr pjesë në Big Brother. Pjesëmarrja e saj në Big Brother u prit me shumë polemika nga shoqëria, por pavarësisht polemikave, Kejda arriti të sillte kauzën LGBTQI+ në ekranet e çdo shtëpie shqiptare.

Rubrika "Personazhi i ditës" - Erjon Tela

Erjon Tela është aktivist shqiptar i cili në fund të vitit 2011 ishte pjesëtar i grupit që themeloi organizatën Pro LGBT. Po atë vit ai nisi të shkruajë në Facebook dy histori të ndara në pjesë të shkurtra për komunitetin LGBT. Duke qënë se komuniteti LGBT portretizohej përmes stereotipeve këto histori shërbyen për të motivuar ata qindra vetë që nuk e gjenin veten në median tradicionale. Këto ishin fillesat e asaj që më vonë u quajt Historia Ime, platforma që u lançua në 2012 edhe vazhdon të mbetet portali i vetëm në shqip për komunitetin LGBT në të gjithë rajonin.

Ai mundi në ato kohë ti bënte një intervistë Vladimir Luxurias, politikanes komuniste, shkrimtares dhe deputetes së parë transgjinore italiane, intervistë që i dha më shume vizibilitet faqes Historia Ime. Erjoni nuk ka qënë një mediatik në aktivizmin e tij por ai ka qënë pas çdo nisme kryesore të dekadës së fundit në Shqipëri. Pjesëmarrës në paradën e parë të krenarisë në prill të 2012, nismëtar edhe pjesëmarrës i cdo aksioni që nga viti 2010.

Ai  ka qënë bashkëthemelues i qendrës Streha (vazhdon të jetë anëtar i bordit të saj) dhe ka qënë menaxheri operacional I saj në momentin kyç, të ngritjes së saj në shtator 2014. Erjoni ka qënë instrumenti kryesor përmes të cilit organizata rinore ndërkombëtare IGLYO ka shtrirë aktivitetin e saj në Shqipëri. Aktualisht jeton në Vankuver të Kanadasë, ku studion biznes në Kwantlen, universitet politeknik publik në British Columbia. Ai vazhdon aktivizmin edhe në Kanada dhe ka fituar për këtë edhe një çmim nga Cher Vancouver, një organizatë rinore queer.